ಮಿತ್ರನಿಗೊಂದು ಪತ್ರ

ಮಿತ್ರನಿಗೊಂದು ಪತ್ರ ಬರೆ
ನೆನಪುಗಳೊಂದು ಚಿತ್ರ ಬರೆ
ಹಗಲಲ್ಲೂ ರಾತ್ರಿಯ ಕತ್ತಲಿದೆ
ಮೋಡಗಳದ್ದೇ ತಂತ್ರ ಬರೆ
ದೇಶದ ಮಡಿಲಲಿ ನೆತ್ತರು ಹರಿಯಿತು
ಮಾತೆಯ ಕೊಂದ ಸುಪುತ್ರ ಬರೆ
'ಸಂಪತ್ತೊಂದೇ ಜೀವನ ಲಕ್ಷ್ಯ'
ನವ ಯುಗದ ನವ ಮಂತ್ರ ಬರೆ
ಕಲುಷಿತ ಸ್ನೇಹ,ಬತ್ತಿದ ಪ್ರೀತಿ
ಮನುಷ್ಯ ಚಲಿಸುವ ಯಂತ್ರ ಬರೆ
ಶಿರಗಳು ಬಾಗಿವೆ ಸ್ರಷ್ಟಿಯ ಮುಂದೆ
ಇದು ಬುದ್ಧಿಗೆ ನಿಲುಕದ ಸೂತ್ರ ಬರೆ
ಲಕ್ಷ್ಮಣ ರೇಖೆಯ ದಾಟುವ ' ಸೀತೆ '
ರಾವಣ ಕಾಮದ ಕುತಂತ್ರ ಬರೆ
ಜ್ಞಾನವೇ ಆಳುವ ಕುರ್ಚಿಯ ಒಡೆಯ
ಅಜ್ಞಾನವು ರಾಜನ ಮಿತ್ರ ಬರೆ